Presidentja e Republikës së Kosovës, Vjosa Osmani – Sadriu, ka udhëtuar dje për në Alpbach, Austri, ku sot pritet të marrë pjesë në edicionin e sivjetëm të Forumit Evropian Alpbach 2023.

Kështu ka bërë të ditur Presidenca përmes një komunikate për media, përcjell Arbresh.info.

Në këtë Forum, Osmani do të jetë folëse në panelin kryesor në hapje të Forumit, i cili do të fokusohet në rishikimin e politikës aktuale të zgjerimit, adresimit të sfidave aktuale politike dhe të sigurisë, si dhe avancimin e Kosovës në rrugën drejt integrimit evropian.

Gjatë Forumit, Osmani do të realizojë edhe një bashkëbisedim me të rinjtë bursistë të Forumit Evropian nga rajoni, diaspora dhe bota, me fokus në zhvillimet e fundit në vend, por dhe qëndrimin e Kosovës karshi zhvillimeve politike në Evropë dhe përtej.

Forumi Evropian Alpbach është ndër institucionet më prestigjioze në Evropë, i cili nga viti 1945, mbledhë çdo vit liderë, nobelistë, akademikë, shkencëtarë dhe personalitete të ndryshme nga mbarë bota për të diskutuar idetë për një Evropë më të fortë dhe më demokratike./Arbresh.info